اخترنا في نهاية هذا الشهر أفضل صورة للعضو kiki من مطعم صيادية اكسبرس


أما أفضل تقييم فكان من نصيب العضو النشيط ابو ميرال عن مطعم جريلد بل بيبر GrilledBellPepper




بسم الله
وصلى الله وسلم على رسول الله

الشباب الي قيمو المطعم خلوني اتوقع انه احسن من ابلبيز وستيك هاوس وتشليز الله يهديهم
والواقع مختلف بعد زيارتي له اليوم

اليوم رحت له انا والعيال على اساس قريت التقييمات الي موجوده هنا وقلت شكل المطعم فلته زمانه ولكن اتضح لي العكس

مستوى المطعم
المطعم في مستوى المطاعم التاليه
(ستيكي – ستيك داينر ) لا يرتقي للكبار ابلبيز وتشيليز وفرايديز مثلا

اليوم الخميس وصادف انه اليوم عوائل فقط وبكره يعني العوائل يومي الخميس والجمعه وباقي الايام عزاب وهذا يدل على ان المكان ضيق وصغير ولا يكفي لفتح صالتين.

والان نتركم مع التقييم

++++++++++++++++++
التقيــــــــــــــــــــــــــــــــــــــم
++++++++++++++++++

ملحوظه التقييم هذا يعبر عن رأي صاحبه ولا يعبر ان رأي الموقع في المطعم وأبو ميرال لا يعجبه العجب ولا الصيام في رجب وعليه جرى التوضيح

التقييم سيكون على النحو التالي

(10) ممتاز |—————————||—————————|(0) سيئ

المكان : (5)
موقع المحل نفسه في موقع صعب في الوقوف والخروج وايجاد موقف كونه عند اشاره حيويه جدا وهي اشاره الملك عبدالله مع التخصصي وزحمه السيارات وايضا سرعه القادمين ويبغون يلفون يمين وانت راجع من موقف السياره قد يسبب مشكله لا قدر الله وعليه نرجو الانتباه اما المكان نفسه للمطعم والمقصود الجلسات والديكورات فالجلسات جيده لابأس ولكن صغيره وفعلا مثل ما قال الاخ قبل اكثر من 5 اشخاص ماراح يكفي بخصوص يوم العوائل فهي بارتشنات مغلقه بستائر الديكور مريح وذلك لإستخدامه اللون البني في الجلسات والحوائط والستائر وكل شئ فيه نوع من الهدوء النسبي

الخدمة والاستقبال: (10)
حقيقه الاستقبال والخدمة كانت رائعه جدا وكان فيه نوع من الترحيب الحار والاستقبال لدرجه اني حسيت اني الوحيد الي جاهم من كم يوم وشكلهم كانو يكشون ذبان قبل ما اجي تعرفون مع عيد اللحم هذا محد يروح لمطاعم ولكن كوني مليت من اللحوم قلت نروح نغير جو في مطعم وقتت الوصول كان بعد المغرب مباشره يوم الخميس طبعا دخلت واكل وطلعت ومافيه غيري في المطعم يعني المفترض اني احصل على احسن الخدمات عندهم. وهذا الذي حصل بالضبط العماله كلها فلبينيه حسبما شاهدت. والاكل وصل بسرعه جدا لدرجه اني حسيت انهم كانو طابخيه قبل وبعدين سخنوه لي ههههههه لكن اكتشفت انه جديد .

الطعام : التقييم الاجمالي (6)

المقبلات :
المقبلات كانت عباره عن التالي
=== تكسس فرايز :(4) ليس في المستوى مثل الموجود في ستيك هاوس لا انصح بطلبه
=== كساديا : ( 9 ) هذي حقيقه رائعه ولذيذه وتستحق التجربة ممتازه
=== بفلو وينقز : تم الطلب وقالو ماعندهم حاليا وانا بس اعرف مطعم حاط شئ في المنيو ومو موجود يطيح من عيني يسكر احسن له

الوجبات الرئيسيه:

=== سلمون : (7) حقيقه السلمون الي اعجبني فيه كانت القطعه كبيره وكانت تشبع وزياده وسلمون رهيب الي عندهم لكن المشكله كانت في الملح يعني لو عندك ضغط يمكن تموت بعد ما تاكل هذي الوجبه الملح ذبحني لدرجه ماقدرت اكمل السلمون طبعا عبرت عن ذلك للجرسون وما شفت شئ صار توقعت على الاقل يقولون لا تدفع قيمته دامه مالح ولا بنغيره لك .

=== بيزل شرمب : (6) هذي الوجبه كانت بالعكس تماما فهي مافيها ولا نقطه ملح ماصخه على الاخير والشرمب كان فيه مثل طعم الدسم واضح وايضا كان فيه طعم حليب او كريمه ما ادري لم يعجبني بخصوص المكرونه كانت عاديه جدا .

=== نقتز اند فرايز للأطفال: ( __ ) لا يوجد تقييم حاليا الين تعرف تتكلم ميرال وتقول لنا كم التقييم الحين لسى ما تعرف تقييم ولكن كلت حبه نقتس والباقي ما بغته وكان فيه خمس حبات نقتس يعني التقييم 1 من 10 ههههه

الحلويات :
لم يتم طلب الحلويات في هذه الزياره

النظافة : (10)
كل شئ نظيف وممتاز ويلق مايحتاج

+++++++++++++++++++++++++++++++++++++++++++++++++++++++

اسئله التقييم

هل تنصح احد بزياره هذا المطعم
لا انصح

هل سوف تزوره لاحقا
لا اتوقع لاحقا سوف ازوره الاوله والاخيره

هل تتوقع يعجب الناس
في الحقيقه فيه ناس قد يعجبهم وفيه ناس قد لا يعجبهم يرجع الى ذوق الشخص

ماذا تنصح صاحب المطعم
والله انصح صاحب المطعم بالتالي
اولا انه يوسع الاماكن شوي
يحاول يحط قسمين للعوائل والعزاب
يحاول يوفر كل الي موجود في المنيو
يحط منجر للمطعم بحيث اي مشكله يعرف عنها المنجر وايضا يحل المشكله ويشتري رضى الزبون
يعلن عن المطعم
المنيو اكثره سندويتشات بينما اتوقع ينجح في الاطباق الاخرى يعني يقلل من السندويتشات ويزيد الاطباق الرئيسية

ويرحم والديكم خففو الملح في السلمون

واخر نصيحه الجرسون الي عندكم الي اسمه ديف حقيقه خدمته رائعه ويستاهل ويتحفى بالزبون وسريع الحضور انصح بالاحتفاظ بجميع الطاقم الموجود بالجرسونز الي عندكم

===================================

هذا مالدي لهذه الزياره وصلى الله وسلم على سيندنا ونبينا محمد

 

Leave a reply

 

Your email address will not be published.